Selajdin Susuri nga Prizreni ka rrëfyer për Gazetën Nacionale se tash e 9 muaj nuk i ka parë gruan dhe katër djemtë e tij. Tre nga djemtë e tij ishin sportistë të dalluar të Kosovës, Susuri tregon që para një kohe ata kishin filluar që të shkonin në xhamia dhe të shoqëroheshin me disa hoxhë nga Prizreni.
Në rrëfimin e tij, Susuri ka treguar se fëmijët e tij i kishin kërkuar që të prej pantallona, të lëshojë mjekrën dhe t’i fal pesë vaktet, mirëpo ai kishte kundërshtuar.
“Dikush prej hoxhallarëve, që thajnë se unë nuk besoj që janë hoxhallarë, e murrën njërin prej tyre e shtinë gjoja si në fe edhe i treguan se çka është haram dhe çka është hallall. Pastaj ai filloj që edhe vëllezërit e tjerë me i mësu me shku në atë xhami. E në atë xhami çka ka ndodhë unë nuk e di.
Edhe para 3 viteve më kanë ik krejt familja sepse unë nuk jam fal si ta. Më thoshin që duhet me i pre pantallonat, me leshu mjekrën, me shku të Idrizi, mu fal si ta nëse e donë mamin, sepse nuk takon gruaja me fjet me to nëse nuk i fal pesë vaktet si ata, jo si hoxhallarët tonë, edhe tash që 9 muaj për të dytën herë ikën prap.” – ka thënë Susuri për Nacionalen.
Susuri ka treguar se familja e tij tashmë është e shkatrruar dhe i njëjti ka folur edhe për gruan e tij, duke thënë se në fillim ishte kundër tyre por pastaj ata e kanë mashtruar dhe e kanë bindur.
“Me ta nuk di as mu marrë vesh. Nuk jam kundër mbulesës, është e drejtë e tyre, edhe e dinë edhe ata se unë një vit e gjysmë kamë ndejtë me ta edhe ja kemi qu mirë, por jam kundër se pse me m’detyru ata mu, na kanë shkatërru.
Në farefis timin dhe të gruas, ka qenë gruaja më e mirë, më e respektume. Në fillim nuk i ka dashtë, bashkë kemi ik, por pastaj e mashtrun edhe e binden.” – ka thënë ndër të tjera ai.
