Osman Stafa
Edi Rama s’ka për t’ia falur kurrë Albin Kurtit që i dogji planin e Open Ballkan. Dhe duke e parë Kurtin si një rrezik pan shqiptar, po e sulmon atë në një moment delikat. Po sulmohet në një kohë kur Kosova kërkon të zbatojë kushtetutën në territorin e saj. Është e drejta e këtij shteti të bëj diçka të tillë përballë tentativave të Beogradit dhe Vuçiçit për të destabilizuar veriun e Mitrovicës.
Unë isha në atë vend, pashë nga afër çfarë ndodh. Atje nuk bëhej fjalë për të drejta pakicash, atje ushqehej ideja e shkëputjesh së atyre territoreve nga Kosova. Çfarë vlere ka të kesh një territor të vendit tënd dhe ti si shtet nuk mund të hysh aty me ligj dhe me institucione? Çfarë emri ka kjo?
Duhet ta pranojmë!
Ndërkombëtarët nuk kanë interes vendosje të drejtësisë asnjëherë. Kanë në interes vetëm stabilitetin rajonal. Ç’u bëhet vonë atyre për ca territore të Kosovës? Po Kosovës i intereson që ç’ke me të ama. Ndërkombëtarët nuk e duan një konflikt në Ballkan, kur një konflikt po ndodh në Ukrainë.
Po ashtu ndërkombëtarët nuk e duan një Serbi krah Rusinë (edhe pse është), por kërkojnë ta mbajnë drejt Europës.
SHBA e quan Kurtin partner, edhe pse të vështirë, por nuk bën fjalë që ai të shpallet non-grata siç raportuan mediat në Tiranë.
Edhe pse Albin Kurti prezantoi planin me 5 pika për të zgjidhur situatën, Kryeministri Rama vazhdon hakmarrjen e tij, sulmin ndaj Kurtit që i bëhet në fakt Kosovës dhe nisi sot sanksionet. Anulon mbledhjen e dy qeverive. Ne nuk jemi një shtet asnjëanës në këtë histori, pasi ata që jetojnë andej kufirit janë shqiptarë. Janë NE.
Dhe tentativa e Ramës për t’iu imponuar Kosovës është e shëmtuar, dëmtuese dhe tinxare. Rama për hir të axhendave të tij po dëmton sot Kosovën.
Kosova dhe shteti i saj është mjaftueshëm i pjekur për t’u marrë me situatën. Nëse shteti shqiptar nuk mbështet interesat e Kosovës, atëherë më mirë mos të flasë.
Sa për Tiranën zyrtare. Sa e sinqertë është meraku për Kosovën kur nuk lëshon zë për Çamërinë? Pse ka frikë Kryeministri shqiptar t’ja thotë këtë Athinës zyrtare?
A i mbron siç e thotë kushtetuta dhe si po i mbron shqiptarët në Maqedoninë e Veriut, Malin e Zi, Luginën e Preshevës?
Qeveria shqiptare dhe Kryeministri Rama po luan pisët me Kosovën dhe kjo po bëhët vetëm për inat të Kurtit dhe hakmarrje personale.