Shtetet e Bashkuara godasin zyrtarin e lartë të Bashkimit Demokratik për Integrim Ramiz Merkon. Departamenti amerikan i shtetit njoftoi se Ramiz Merko është futur në listën e personave të padëshiruar me çka i ndalohet hyrja në Shtetet e Bashkuara të Amerikës, për shkak të përfshirjes së tij në korrupsion të konsiderueshëm. Në njoftimin e Departamentit amerikan të shtetit më tej thuhet:
“Ndërsa shërbente si kryetar i komunës së Strugës, Merko shpërdoroi fondet dhe ndërhyri në proceset gjyqësore dhe procese të tjera publike, duke dëmtuar besimin e publikut në institucionet demokratike dhe zyrtarët e Maqedonisë së Veriut.
Veprimi i djeshëm dërgon një mesazh se Shtetet e Bashkuara qëndrojnë me Maqedoninë e Veriut për të nxitur stabilitetin përmes forcimit të institucioneve demokratike dhe adresimit të mangësive të sundimit të ligjit.
Ky emërtim ripohon angazhimin e Shteteve të Bashkuara për të luftuar korrupsionin, i cili dëmton interesin publik, pengon prosperitetin ekonomik të vendit dhe pakëson aftësinë e qeverisë për t’iu përgjigjur në mënyrë efektive nevojave të qytetarëve”, thonë nga Departamenti Amerikan i Shtetit.
Departamenti amerikan i shtetit njofton se në këtë listë automatikisht janë vendosur edhe bashkëshortja e Ramiz Merkos dhe tre fëmijët.
“Ky përcaktim publik është bërë sipas seksionit 7031(c) të Aktit të Ndarjeve të Departamentit të Shtetit, Operacioneve të Jashtme dhe Programeve të Përafërta, 2023. Departamenti po cakton gjithashtu gruan e Merkos, Shpresa, dhe tre fëmijët e rritur, Genc, Nazmije dhe Drenushe të papërshtatshëm për hyrje në Shtetet e Bashkuara”, shtuan nga Departamenti Amerikan i Shtetit.
