Komuna e Tetovës, përmes këtij reagimi dëshiron që të sqarojë opinionin publik lidhur me publikimin e lajmit “Komuna e Tetovës rrit borxhin e shkollave….”, që është shpërndarë nëpër disa portale poltrone të BDI-së, të cilët me çdo kusht kërkojnë të njollosin punën e administratës së re të komunës së Tetovës.

Sipas këtyre portaleve Komuna e Tetovës paska rritur borxhin publik të shkollave, por duke mos precizuar se shkollat financohen nga bllok dotacionet e pushtetit qendror.

Andaj ndjejmë obligim që ne si komunë ta informojmë opinionin publik se këto informata janë tërësisht të pavërteta dhe janë tendencioze me qëllim të dezinformojnë opinionin dhe të defokusojnë atë.

Këta fatura janë rrjedhëse dhe kanë arritur në shkolla në fund të muajit dhjetor, në kohën kur procesi i qarkullimit të pagesave është i pamundur. Kryesisht janë faturat në lidhje me transportin e nxënësve të shkollave të mesme.

Pra janë bllok dotacionet që vijnë nga ministria e arsimit dhe shkencës dhe do të shlyhen gjatë kësaj periudhe.

Komuna e Tetovës vazhdimisht po bën përpjekje që të sigurojë kushte më të mira për mbarëvajtjen e procesit arsimor dhe për asnjë moment nuk është vënë në pikëpyetje kjo çështje.