Vendimi për “Titanik 2”, i cili 43 ditë ka udhëtuar nga Gjykata Penale në Gjykatën e Apelit, tani është kthyer në gjykatën e shkallës së parë. Arsyeja është se Gjykata Penale e ka dërguar lëndën para kohe dhe nuk ka pritur afatin prej 15 ditësh në të cilin të akuzuarit, përfshirë ish-drejtorin e DKS-së, Sasho Mijalkov dhe liderin e PDSH-së, Menduh Thaçi, mund të dërgojnë ankesa.
“Dorëzimi i fundit i aktgjykimit të shkallës së parë i akuzuari është pranuar më 2.3.2023, që do të thotë se afati për paraqitjen e ankesës ka filluar më 3.3.2023 dhe afati në të cilin i akuzuari mund të shfrytëzojë të drejtën e ankesës skadon më 17.3.2023”, thonë nga Gjykata e Apelit, prej ku shtojnë se “Gjykata e shkallës së parë nuk ka pritur afatin 15 ditor për ankim të mundshëm dhe para skadimit të këtij afati ka dorëzuar lëndën me procesverbal dhe vendim në Gjykatën e Apelit në Shkup”.
Ligji për procedurë penale parasheh se ankesa dhe përgjigja në ankesë me të gjitha shkresat, gjykata e shkallës së parë në afat prej tri ditësh nga marrja e përgjigjes në ankesë, pra pas kalimit të afatit për paraqitjen e përgjigjes në ankesë, i dorëzon në gjykatën e shkallës së dytë.
“Për arsyet e cekura, çështja është kthyer administrativisht në gjykatën e shkallës së parë në mënyrë që pas skadimit të afateve ligjore për paraqitjen e ankimit, pra përgjigje në ankesë, të procedohet me të gjitha dokumentet në Gjykatën e Apelit në Shkup për vendim në procedurë ankimore”, theksojnë nga Gjykata e Apelit.
Aktgjykimi për ish-drejtorin e DSK-së, Sasho Mijalkov dhe për kryetarin e PDSH-së, Menduh Thaçi, në rastin “Titanik 2”, ka udhëtuar 43 ditë nga Gjykata Penale në Gjykatën e Apelit.
Tani kanë mbetur edhe 23 ditë deri në vjetërsimin e lëndës, dhe ky është afati në të cilin Apeli duhet ta marrë lëndën, të marrë mendim nga Prokuroria e Lartë – Shkup, të caktojë seancë publike dhe të marrë vendim. Përndryshe, Mijalkov mund të shpëtojë nga përgjegjësia.
Mijalkov po ndiqet penalisht për parregullsi zgjedhore në zgjedhjet e vitit 2013, vepër penale që vjetërsohet pas 10 vitesh, pra në vitin 2023.
Për këtë lëndë dy herë është shqiptuar vendim. I pari u anulua nga Apeli në dhjetor 2019.
Prej atëherë deri në janar 2023, çështja u gjykua në Gjykatën Penale. Gjyqtarët Ognen Stavrev dhe Osman Shabani edhe një herë i shpallën fajtorë të akuzuarit. Në gjykimin e përsëritur, ish-drejtori i DSK-së, Sasho Mijalkov dhe lideri i PDSH-së, Menduh Thaçi, u dënuan me dy vjet búrg.
