Organizata “HUTA” ditën e premte me 19.05.2023 realizoi takim me drejtorin e Muzeut të Tetovës Miqo Stojçevski dhe të punësuarit Shqiptarë të Muzeut. Qëllimi i vizitës ishte mbikëqyrja e punimeve, kushtet për hapjen e Muzeut të ri, materiali i cili do të ekspozohet si dhe mbajtja e ekspozitave apo punëtorive të ndryshme.
Fillimisht na u prezantua hapësira ku do të ekspozohen sende të historisë, arkeologjisë, etnologjisë etj.
Gjërat që mungonin për hapjen e kësaj salle ishin: vitrinat Muzeore, kukulla për veshje, ndriçim dhe nderim i dritareve të vjetra.
Kaluam në hapësirën e dytë, e cila planifikohet të jetë BIFE, ku vizitorët do të mund të shërbehen me ushqime dhe pije, ndërsa në pjesën e jashtme të këtij objekti do të jenë të ekspozuara objekte tjera më të mëdha si: pajtone apo pavijone, dhe një hapësirë për depo e cila duhet pastruar, lyer dhe të përgatiten rafte për deponimin e objekteve të reja.
Për punimet e BIFES vetëm se është hapur tender për të kryer punimet në të, ndërsa ajo që është bërë deri tani është pastrimi i mbeturinave dhe vendosja e një dyshemeje të re.
Vazhduam në katin e I, aty ku do të jenë zyrat e punëtorëve të Muzeut dhe një sallë mbledhjesh dhe biblioteka. Dritaret janë ndruar, disa zyra janë përfunduar, ndërsa ngelet dhoma e bibliotekës, hapësira për mbledhje dhe banjot të rregullohen.
Ajo që ne kërkuam nga Muzeu i Tetovës ishte transparencë dhe respektimi i dy gjuhësisë sipas marrëveshjes së Ohrit dhe kushtetutës së RMV, përfshirja e historisë shqiptare në Muze, ueb faqe të Muzeut të Tetovës, përfundimi i punimeve në një afat sa më të shkurtër për ta hapur Muzeun e ri të Tetovës që të kemi edhe ne në Tetovë një Muze modern dhe adekuat.
U zotuam se do ta ndihmojmë Muzeun në realizimin e punimeve, materialin e grumbulluar në Muzeun Virtual do ta dërgojmë në Muze dhe bashkëpunim të mirëfilltë në të ardhmen.
Nga ana e Muzeut si dhe Drejtori u zotuan se do të ketë më shumë transparencë, do të krijohet një ueb faqe së shpejti ku do të jepen të gjitha informatat rreth punimeve dhe evenimenteve, seminareve etj. si dhe na u dha Shtatori si një muaj i paraparë për hapjen e objektit të ri të Muzeut të Tetovës.
Ne si organizatë jo qeveritare “HUTA” do të vazhdojmë edhe më tutje të publikojmë histori të ndryshme për Tetovën dhe do të punojmë për mbrojtjen e trashëgimisë kulturore shpirtërore të Tetovës.
