Ish ministri i Shëndetësisë Bekim Sali, në konferencë për media gjatë ditës së sotme, ka folur për tragjedinë e spitalit modular të Tetovës. Ai ka thënë se sa ka qenë në detyrë, ka kërkuar revizion të brendshëm, për shkak dyshimeve se tragjedia ka ndodhur si pasojë e abuzimit më procedurën ndërtimore dhe procedurën e furnizimit publik.
Sali tha se në bazë të revizionit ka marrë vendimi që kompanisë e cila ka bërë punimet të mos i paguhet asnjë denarë.
Por çuditërisht, tha Sali, pasardhësi i tij, më 23 korrik, përmes Qeverisë, ka iniciuar pagesën e borxhit ndaj kompanisë BRAKO, kjo edhe përkundër rekomandimeve të revizionit të brendshëm.
“Me fjalë të tjera, njëri ndër fajtorët e pretenduar kryesorë në emisionin “Vrasje në Tetovë” është shpërblyer. Pas kësaj, nuk mund të mos e shtrojmë pyetjen se e kujt ka qenë iniciativa reale e amnistisë së BRAKO-s dhe vazhdimin e pagesës, duke mos e respektuar rekomandimin e revizionit?! A është kjo kërkesë e Kovaçevskit, mashtrim a joshje e Fatmir Mexhitit apo porosi e Artan Grubit?! Fatmir, mos edhe për këtë dështim fajin ta ka udhëheqësia e kaluar e Ministrisë së Shëndetësisë dhe ish ministri? Cili është detyrimi që ka kjo qeveri ndaj Koço Angjushevit dhe pse qeveria është në gjendje të bëjë edhe shkelje mbi kufomat e 8 shtatorit 2021 vetëm për të përfituar disa miliona euro më shumë?! Edhe çka duhet t’i ndodhë Kovaçevskit dhe Fatmir Mexhitit që të japin dorëheqje dhe të kërkojnë falje për të gjitha këto dëme që ua shkaktojnë qytetarëve?!:, ka deklaruar Bekim Sali.
Sali ka shtuar se në një vend ku pacientët digjen në spital, ku qeveritarët numërojnë milionat, ku prokurorët tallen me viktimat dhe ku fajtorët shpërblehen me miliona të tjera, ka ardhur koha të themi se ky shtet ka falimentuar plotësisht dhe duhet ristartuar.