Gjatë fundjavës teksa Gabriel Escobar dhe Miroslav Lajçak po përpiqeshin ta bindnin Kryeministrin Kurti që t’i tërheq pjesëtarët e njësisë speciale dhe që kryetarët të punojnë në objekte alternative, për t’i hapur rrugë zgjedhjeve të reja në katër komunat veriore, ambasadori amerikan në Beograd Christopher Hill e humbi durimin.

“Mendoj se kemi një problem me zotin Kurti, ai nuk është i gatshëm ta pranojë. Më duket se kemi disa probleme shumë thelbësore me të, nëse ende mund ta konsiderojmë si partner. Por këtë vendim ia lë ambasadës sonë në Prishtinë” tha Hill në një intervistë për Zërin e Amerikës në gjuhën serbe.

Deklarata e ashpër ambasadorit veteran të diplomacisë amerikane ditën e enjte të javës që shkoi, erdhi pasi dy diplomatët Gabriel Escobar dhe Miroslav Lajcak tentuan ta bindin Kurtin për “deeskalimin” e situatës në Veri.

Por, kjo deklaratë, “u përmirësua” nga Gabriel Escobar

I dërguari i Shteteve të Bashkuara për Ballkanin Perëndimor, Gabriel Escobar tha gjatë një interviste për Institutin për Politikë dhe Ekonomi të Evropës Juglindore në Beograd se kryeministri i Kosovës “Albin Kurti në disa raste është një partner i vështirë, por gjithsesi është partner i Shteteve të Bashkuara”.

“Më duhet ta sqaroj, z.Kurti është partneri ynë. Ai nganjëherë është partner i vështirë, por është partner. Kosova është partneri jonë. Serbia është partneri jonë. Kështu që në të ardhmen, ne duam t’i përdorim marrëdhëniet e mira që kemi me Kosovën dhe përmirësimin e marrëdhënieve që kemi me Serbinë që të gjejmë një rrugë të pranueshme dhe me beneficione për të dyja, që të mund të jenë pjesë e BE-së”, tha Escobar.

Sidoqoftë për pozicionin amerikan në raport me qeverinë dhe Kryeministrin Kurti pritet të merret vesh më shumë pasi emisari Escobar t’i raportojë Shtëpisë së Bardhë për vizitën në Prishtinë dhe Beograd.

Në intervistën e publikuar dje Escobar vetëm ka thënë se është i ftuar në Shtëpinë e Bardhë për të raportuar për vizitën në Kosovë dhe Serbi. Ai megjithatë nuk ka treguar nëse e ka kryer raportimin.

“Jam ftuar që Shtëpisë së Bardhë t’i raportojë për rezultatet e vizitës sonë në Beograd dhe Prishtinë. Në bazë të përparimit apo mungesës së tij do të vendosim për drejtimin e veprimit tonë” ka thënë Escobar.