DEMANT
I MYFTINISË SË VELESIT ME RASTIN E BASTISJES SË NËPUNËSIT A.Ç. NË MELLNICË
Muftinia e Bashkësisë Fetare Islame- Veles, përgënjeshtron lajmet që qarkullojnë në disa portale lidhur me njoftimin e Ministrisë së Punëve të Brendshme për aksionin e bastisjes në komunën Çashkë, gjegjësisht në fshatin Mellnik, ku është arrestuar personi A.Ç (50) për dyshimet se ka kryer veprën penale “blerje votash” dhe “armëmbajtje pa leje”.
Fatkeqësisht, për shkak se jemi në prag të zgjedhjeve parlamentare, disa qarqe përpiqen ta politizojnë skajshmërish dhe ta vënë në shërbim të agjendave të tyre djallëzore, sidomos kur mësohet se i ndaluari është punonjës i Muftinisë së Velesit.
Prandaj, ne si Muftini e Velesit ndjejmë nevojë urgjente që ta njoftojmë opinionin e gjerë dhe t’i përgënjeshtrojmë këto spekulime dashakeqe, duke bërë të ditur se personi A.Ç është arrestuar për shkak të mbajtjes së armës, ndërsa shumën e parave që përmendin portalet, me përgjegjësinë më të madhe vërtetojmë se janë të dokumentuara dhe evidentuara në Muftininë e Velesit dhe janë para të Muftinisë që shërbejnë vetëm për nevojat e saj.
Për shkak të mungesës së arkës dhe kushteve të përshtatshme dhe të sigurta për ruajtjen e tyre, ato para janë mbajtur në shtëpinë e arkëtarit të Muftinisë. Me përgjegjësinë më të madhe pohojmë se kjo aspak nuk ka të bëjë me pretendimet për blerjen e votave. Këto janë shpifje të ulëta që kanë për qëllim dëmtimin dhe njollosjen e imazhit të Muftinisë së BFI Veles.
Muftinia e Velesit për këtë rast menjëherë ka njoftuar organet më të larta të Bashkësisë Fetare Islame të cilat pas zbardhjes së rastit, do të marrin masa adekuate.
Muftnia e BFI Veles
Koordinator: Nejaz Murati