Rreth 60 kompani të njohura kanë marrë pjesë në Panairin e Karrierës, që u mbajt sot (9 maj 2023), në Universitetin e Evropës Juglindore, në organizim të Qendrës së Karrierës.
Ngjarjen e shpalli të hapur, Rektori i UEJL-së, Akad. Prof. Dr. Abdylmenaf Bexheti, i cili falënderojë pjesëmarrësit, në veçanti kompanitë për interesin e treguar dhe studentët për pjesëmarrje.
“UEJL çdo vit bënë raport të punësueshmërisë, i cili u dërgohet të gjitha institucioneve në vend. Praktikë që nuk e bënë asnjë universitet tjetër në vend, por edhe në rajon.
Sipas këtij raporti, 65% e të diplomuarave, në një periudhë prej 6 muajsh pas diplomimit punësohen dhe nëse kësaj shifre i shtojmë edhe rreth 20% të atyre që me dëshirë nuk kërkojnë punë, pasi kanë përcaktime të ndryshme të karrierës, atëherë punësueshmëria e të diplomuarve tanë arrin në 83%. Ajo që është shumë e rëndësishme dhe që e dallon Universitetin është se rreth 70% e numrit të përgjithshëm të të punësuarve i takojnë sektorit privat”, theksoi Rektori Bexheti.
Panairi i Karrierës mbahet për të 16-tën herë dhe paraqet një mundësi të mirë për studentët për të u takuar me punëdhënës potencial, ku diskutojnë rreth mundësisë për të u punësuar, për t‘u angazhuar si praktikant dhe për të diskutuar rreth përshtatshmërisë së kualifikimeve dhe aftësive të tyre me kërkesat e tregut të punës apo kompanisë në fjalë.