Ish kryetari i Aleancës për Shqiptarët, Ziadin Sela e ka takuar i pari Abdylfeta Alimin pas daljes nga porta e burgut të Idrizovës, shkruan gazeta LAJM. Sela tha se sot ndjehet i çliruar pasi, siç u shpreh, brenda këtyre gjashtë viteve sa ishte në burg Abdylfetai edhe ai ishte i robëruar, ndonëse nuk ndodhej brenda burgut.
“Kam thënë se më është shtua një mik, një vëlla, një anëtar i familjes, që nga 27 prilli. Sot ndihem ashtu siç do të ndieshte një familjar i Fetait, ashtu siç do të ndieshte një njeri që i ka borxh jetën tjetrit. Ndjehem i lirë po aq sa Fetai, ashtu siç jam ndjerë jashtë mureve të këtij burgu, por i robëruar bashkë me Fetain, Unë sot e quaj një nga ditët normale të cilën gjatë kohë nuk e kam parë. Ndjehem dhe krenarë me pamposhtësinë dhe vendosmërinë e Fetait, ky burrë nuk u përul kurrë.
E di se janë munduar që ta thyejnë, që t’i nxjerrin veshin a këmbën, dhe gjëra të tjera, e di që janë munduar që ta joshin, por ky ka zgjedhur atë që e ka traditë shqiptari, nderin dhe respektin. Ta nderoj veten dhe familjen e tij. Unë jam pjesë e familjes së tij, më ka nderuar dhe mua ”, tha Sela.
Ndwrkohw, dje ka përfunduar masa e burgut për ish-sigurimin e Kuvendit, Abdylfeta Alimi njëherësh personi i cili më 27 prill të vitit 2017 kishte shpëtuar Ziadin Selën i cili ishte cak i sulmit të protestuesve të dhunshëm. Gjatë daljes nga Burgu i Idrizovës, Alimi është pritur nga Ziadin Sela, i cili në një prononcim para mediave sërish e falënderoi Alimin për siç tha, që ia kishte shpëtuar jetën.
Alimi vuajti 6 vite e dy muaj burg nën akuzën për bindje ndaj urdhrit të paligjshëm dhe mos veprim, përkatësisht akuza e tij kryqëzohej me veprimet e dy ish-deputetëve të VMRO-DPMNE-së, Kërsto Mukoski dhe Sashe Vasilevski të cilët kishin hapur portat kryesore të Kuvendit duke i mundësuar hyrjen e protestuesve të dhunshëm në Parlament. Alimi u përfshi në akuzë edhe pse dispozitat ligjore përcaktojnë qartë se sigurimi i Kuvendit (polici) nuk ka të drejtë të ndërmerr veprime kundër deputetëve.
