Punimet për qarkoren shumë të përfolur në opinion për rajonin e Tetovës dhe lidhjen me vendbanimet përreth nga drejtimi i Kosovës, pritet të fillojnë muajin shtator, ndërsa javën që vjen pritet të shpallet tenderi për realizuesin e punimeve. Kështu paralajmëruan nga Ndërmarrja Publike “Rrugët Shtetërore”, shkruan Portalb.mk.

Në autostradën Shkup – Tetovë – Gostivar ka vetëm një qarkore cila lidhet me Gostivarin. Ndërkaq automjetet tjera që kanë destinacion komunat si Tearca, Jegunoci apo edhe Kosovën, duhet të futen në Tetovë për t’u lidhur më pas me rrugën rajonale Tetovë – Jazhincë. Kjo shkakton ngarkesë shtesë në komunikacionin e stërngarkuar të Tetovës.

Në vitin 2019 kryetarët e komunave Tetovë, Tearcë, Jegunoc dhe Zhelinë kërkuan ndërtimin e qarkores në hyrje që Tetovës, kjo kërkesë ishte pranuar nga kryeministri i asaj kohe Zoran Zaev.

Kjo qarkore figuron edhe si premtim parazgjedhor edhe në Programin 2020-24 të Bashkimit Demokratik për Integrim. E njëjta është paraparë te pjesa e infrastrukturës rrugore, konkretisht te zhvillimi i rrugëve rurale thuhet: “Nyja lidhëse e urës Trebosh në vlerë prej 3 milion euro. Komunat Tetovë, Zhelinë, Jegunovcë dhe Tearcë”.

Megjithatë për disa vite rezultat dhe punë në terren nuk pati.

Drejtori i Ndërmarrjes Publike “Rrugët Shtetërore”, Ejup Rustemi i pyetur për këtë premtim se kur do të fillojnë punimet për qarkoren e Tetovës tha se punimet priten të nisin në shtator.

“Kemi edhe lejen për projektin infrastrukturor, janë bërë të gjitha elaboratet për të filluar edhe eksproprijimi i tokave, javën që vjen shpallim edhe tenderin për zgjedhjen e realizuesit të punimeve dhe shpresojmë se nga shtatori aty do të shihni inercionet për të filluar ndërtimin e qarkores e cila është jashtëzakonisht e rëndësishme për Tetovën”, deklaroi Rustemi.

Ndryshe, qarkorja e re planifikohet të ndërtohet nga autostrada në Tetovë nga pjesa e zonës industriale dhe të del në fshatin Neproshten (Komuna e Tearcës). E njëjta planifikohet të jetë e gjatë rreth 6 kilometra. Qytetarët që nuk kanë destinacion Tetovën duk do të futen në qytet dhe kjo pritet të lehtësojë komunikacionin.