Senati i UEJL-së e miratoi konkursin për regjistrimin e studentëve në vitin e ri akademik- Risi pesë drejtime të reja studimore.
Në mbledhjen e radhës të Senatit të Universitetit të Evropës Juglindore, që u mbajt të martën (25 prill 2023), u miratua Konkursi për regjistrimin e studentëve në vitin e ri akademik 2023/2024.
UEJL në këtë vit akademik paraqitet me ofertë të begatshme të programeve studimore në gjashtë fakultetet ekzistuese në kuadër të Universitetit dhe atë në tre ciklet studimore me gjithsejtë: 29 programe studimore në ciklin e parë (Bachelor), 25 programe studimore në ciklin e dytë (Master) dhe 13 programe studimore në ciklin e tretë (PhD). Në vitin e ri akademik risi janë programet e reja studimore, si: Politeknikë, Dizajn i Brendshëm, Shkenca e të Dhënave, Edukim dhe drejtimi Psikologji.
Universiteti vazhdon të ruaj fleksibilitetin në përdorimin e gjuhëve dhe një sërë programesh studimore ofrohen paralelisht në të tre gjuhët zyrtare: në shqip, maqedonisht dhe anglisht.
Në kuadër të ofertës akademike, për vitin e ri akademik mjaftë atraktive është edhe oferta e bursave, ku të gjithë maturantët, të cilët në shkollën e mesme kanë arritur sukses të shkëlqyeshëm (5.00), fitojnë bursë të plotë që mbulon 60%, të pagesës së shkollimit. Maturantët, të cilët në shkollën e mesme kanë arritur sukses prej 4.5 – 4.99, fitojnë bursë për mbulimin e pagesës së shkollimit prej 40%. Lehtësime financiare ka edhe për studentin e dytë dhe të tretë të familjes, që studiojnë njëkohësisht, të cilët fitojnë 15%, respektivisht 25%.
Mundësi shumë e mirë dhe unike e UEJL-së është programi “Puno dhe Studio”, ku studentët e angazhuar punojnë në shërbimet kryesore të Universitetit, kundrejt kompensimit financiar që u jepet për orët e angazhimit, i cili më pas minusohet nga pagesa e shkollimit.
