Kryetari i partisë Alternativa, Afrim Gashi është pyetur edhe lidhur me propozimin e Sekretarit të Partisë, Zeqirija Ibrahimi lidhur me formimin e “Asociacionit të Komunave me Shumicë Shqiptare”.
Ai ka thënë se ky asociacion nuk do të jetë në dëm të askujt, por përfitues do të jenë të gjithë.
“Përveç kësaj, asociacioni nuk duhet të jetë zëvendësim i Marrëveshjes së Ohrit ose të bëhet nëpërmjet mjeteve jodemokratike. Maqedonia e Veriut është më afër se kurrë me BE-në, prandaj nuk duhet të ketë frikë nga dialogu me argumente dhe bindje. Kjo është vlerë evropiane”, ka thënë Gashi.
Gashi ka shtuar se decentralizimi tashmë 20 vite qëndron akoma në vend, dhe kemi komuna me popullsi shqiptare si Studeniçani, Likova dhe Haraçina të cilët nuk kanë kurrfarë resurse dhe shanse për zhvillim.
“Prandaj asociacioni i tillë, i cili do të jetë në favor të zhvillimit ekonomik, në aplikimin e përbashkët për projekte dhe ndihmë të ndërsjellë në ngritjen e standardit jetësor, nuk do të jetë në dëm të askujt dhe të gjithë ata që do të jetojnë në komuna të tilla do të përfitojnë. Ne nuk kemi thënë se duhet të formohet asociacioni i komunave me kompetenca ekzekutive ose atribute të tjera separatiste. Nga ana tjetër, më vjen keq që nuk mund të ndihmoj për të kuruar albanofobinë”, është shprehur Gashi në intervistën për Press24.