Në qytetin Sharika të Emirateve të Bashkuara Arabe në evenimentin programor intelektual për dialog kulturor u promovua libri “Kultura arabe dhe islame në Maqedoni dhe Kosovë shekulli 15-18” i autorit Prof. Dr. Ismail Ahmedi. Libri u botua nga ana e Institutit për Trashëgimi Kulturore të Sharikas në vitin 2021 dhe promovimi në prezencë të autorit u bë më 18 mars 2023 (e shtunë).

Në të njëjtën kohë, u promovuan edhe vepra të autorëve tjerë nga Maqedonia e Veriut siç është Fjalori Arabisht – Shqip i përgatitur nga prof. Mahir Hasani, i cili përmban afro 170 mijë fjalë dhe ne pergaditjen e tij eshte punuar gati 9 vite.

Këta promovime bëhen në suaza të manifestimit të ditëve kulturore të Sharikas ku enkas u organizua program intelektual për dialog nderkulturor me temën “Trashëgimia kulturore arabe në veprat e autorëve nga Maqedonia e Veriut”.

Ky aktivitet vjen në vazhdën e organizimeve të mehershme brenda projekteve të diplomacisë kulturore dhe dialogut ndërkulturor mes Maqedonisë së Veriut dhe Emirateve të Bashkuara Arabe të iniciuara nga Ambasadori i Maqedonisë së Veriut në EBA – Abu Dhabi, Abdulkadar Memedi.

Në kuadër të këtij evenimenti me prezantimet e tyre u paraqitën prof. Dr. Ismail Ahmedi, prof. Mahir Hasani dhe pjesmares te tjere, kurse te njejtin e moderoi prof. Dr. Menni Bunuama, Drejtori per botime dhe publikime i Institutit. Libri “Kultura arabe dhe islame në Maqedoni dhe Kosovë shekulli 15-18” i autorit Prof. Dr. Ismail Ahmedi përmbledh fakte historike dhe shkencore të lashtësisë së trashëgimisë kulturore dhe zanafillës së kultures arabo-islame në trojet tona, komunikimit ndërkulturor, e ardhmja dhe përfitimet e saja afatgjate.

Vlen të theksohet se vepra e prof. dr. Ismail Ahmedit u radhit në mesin e botimeve të dalluara të Institutit të Sharikas, nga ana e të cilit u prezantua në disa manifestime botërore, siç ishte edhe Panairi ndërkombëtar i librit I mbajtur në Repubulikën Arabe të Egjiptit në shkurt të këtij viti. Fjalori Arabisht – Shqip i Prof. Mahir Hasanit është në fazën përfundimtare të botimit dhe i njëjti paraqet një domosdoshmëri të nevojshme për të gjithë nxënësit, studentët dhe hulumtuesit e gjuhës dhe kulturës arabe, si dhe i njëjti së shpejti pritet të gjendet në duart e lexuesve në trojet tona.